उद्योग वाणिज्य महासंघका पदाधिकारीहरुलाई निर्माण व्यवसायी महासंघको सम्मान

  • Home
  • News & Events
  • उद्योग वाणिज्य महासंघका पदाधिकारीहरुलाई निर्माण व्यवसायी महासंघको सम्मान

पुष ३, काठमाडौं । नेपाल निर्माण व्यवसायी महासंघले नेपाल उद्योग वाणिज्य महासंघको ५४ औं साधारण सभा एवं निर्वाचनबाट नवनिर्वाचित अध्यक्ष, पदाधिकारी एवं वस्तुगत तर्फका कार्यकारिणी समितिका सदस्यहरुको सम्मानमा कार्यक्रम आयोजना गरेको छ । विहिवार राजधानीमा आयोजित कार्यक्रमलाई सम्बोधन गर्दै नेपाल निर्माण व्यवसायी महासंघका अध्यक्ष रवि सिंहले निर्माण व्यवसायीका समस्याहरु बारे जानकारी गराउनुभयो । नेपाल उद्योग वाणिज्य महासंघको विगतको नेतृत्वले निर्माण व्यवसायीका समस्याहरु समाधान गर्न नसकेको उल्लेख गर्दै अध्यक्ष सिंहले अब त्यस्तो परिस्थिति नदोहोरिने विश्वास व्यक्त गर्नुभयो । सशक्त वस्तुगत सदस्यको हैसियतले निर्माण व्यवसायी महासंघले उद्योग वाणिज्य महासंघ सँगको सम्बन्धलाई अझ प्रगाढ बनाउँदै लैजाने अध्यक्ष सिंहले बताउनुभयो । “निजी क्षेत्रमाथि चारैतिरबाट औला ठड्याउँदै चौतर्फी प्रहार भइरहेको अवस्थामा निजी क्षेत्रका संघ संस्थाहरुबीच सहकार्यको विकल्प छैन” अध्यक्ष सिंहले भन्नुभयो । सरकारले निजी क्षेत्रलाई आफ्नो स्वार्थ अनुसार प्रयोग मात्र गर्दै आइरहेको आरोप सिंहले लगाउनुभयो । कोभिड–१९ का कारण निर्माण क्षेत्र आक्रान्त भएकाले समस्या समाधानका लागि सरोकारवाला निकायलाई पटक पटक पत्रचार गर्दा पनि कुनै सुनुवाई नभएको सिंहले बताउनुभयो । निर्माण व्यवसायी महासंघको मागलाई सम्बोधन गर्ने विषयमा अब उद्योग वाणिज्य महासंघले पनि ठोस पहल गर्ने विश्वास उहाँले व्यक्त गर्नुभयो । नेपाल उद्योग वाणिज्य महासंघका अध्यक्ष शेखर गोल्छाले समस्याग्रस्त निजी क्षेत्र कोभिड–१९ का कारण थप मारमा परेको बताउनुभयो । निर्माण क्षेत्रको समस्याबारे आफू जानकार रहेको बताउँदै अध्यक्ष गोल्छाले म्याद थपको माग जायज रहेको स्विकार गर्नुभयो । नेपाल उद्योग वाणिज्य महासंघको भूमिकालाई अझ प्रभावकारी बनाउन निर्माण व्यवसायी महासंघ जस्ता वस्तुगत संघबाट रचनात्मक सहयोगको अपेक्षा गरेको गोल्छाले बताउनुभयो । महासंघलाई अझ सुदृढ संस्थाको रुपमा विकास गर्न “भिजन पेपर” निर्माणको तयारी भइरहेको भन्दै उहाँले आवश्यक सरसल्लाह दिन आग्रह गर्नुभयो । नेपाल निर्माण व्यवसायी महासंघका वरिष्ठ उपाध्यक्ष निकोलस पाण्डेले धर्मराउँदो निजी क्षेत्रलाई सम्हाल्ने दिशामा उद्योग वाणिज्य महासंघको वर्तमान नेतृत्वबाट आफू अत्यन्त आशावादी रहेको बताउनुभयो । विकास बजेटको सबैभन्दा बढी भार बोक्ने क्षेत्र निर्माण व्यवसाय नै रहेको जानकारी गराउँदै पाण्डेले प्रत्यक्ष तथा अप्रत्यक्ष रुपमा ८ लाख बढीलाई निर्माण व्यवसयाले नै रोजगारी दिएको बताउनुभयो । नेपालको अर्थतन्त्रलाई चलायमान बनाउन निर्माण क्षेत्रको भूमिका अपरिहार्य रहेको उहाँको तर्क थियो । नेपाल निर्माण व्यवसायी महासंघका महासचिव रोशन दाहालले महासंघको संक्षिप्त चिनारी प्रस्तुत गर्दै पूर्वाधार विकासको क्षेत्रमा निर्माण व्यवसायीहरुको महत्वपूर्ण योगदान रहेको बताउनुभयो । नेपाल उद्योग वाणिज्य महासंघ सँगको सम्बन्धलाई नेपाल निर्माण व्यवसायी महासंघले उच्च महत्व दिएको बताउँदै उहाँले आपसी सहकार्यबाट मात्र निजी क्षेत्रको समस्या समाधान गर्न सकिने बताउनुभयो । कार्यक्रममा नेपाल निर्माण व्यवसायी महासंघका अध्यक्ष रवि सिंह, सल्लाहकार रमेश शर्मा, सल्लाहकार ग्याल्जे शेर्पा, ई. विरेन्द्रराज पाण्डे लगायतले उद्योग वाणिज्य महासंघको ५४ औं साधारण सभा एवं निर्वाचनबाट निर्वाचित अध्यक्ष, पदाधिकारी एवं वस्तुगत तर्फका कार्यकारिणी समितिका सदस्यहरुलाई मायाको चिनो प्रदान गर्नु भएको थियो ।

Leave A Comment